اسلام آباد۔9فروری (اے پی پی) نگران وفاقی وزیر اطلاعات، نشریات تے پارلیمانی امور مرتضیٰ سولنگی آکھیا جو وݙی تعداد اچ آزاد امیدواراں دا جتݨ نشابر کریندے جو انتخابات شفاف تھین، سکیورٹی دے خطرے پاروں موبائل سروس بند کیتی ڳئی۔ فکسڈ براڈ بینڈ دی سہولت پوری چلدی پئی ہئی۔ اے ڳالھیں انہاں جمعے کوں نگران وزیر داخلہ ڈاکٹر گوہر اعجاز دے رلے پریس کانفرنس توں خطاب کریندیں ہوئیں آکھی۔ایں موقع تے پرنسپل انفارمیشن آفیسر ڈاکٹر طارق محمود وی موجود ہن۔ وفاقی وزیر اطلاعات پرامن انتخابات کراوݨ تے پاکستان دی عوام کوں مبارخ ݙتی۔ انہاں آکھیا جو نگران حکومت پچھلے سال 17 اگست 2023ءکوں جݙاں حلف چاتا ہئی تاں اساں وعدہ کیتا ہئی جو الیکشن کمیشن جیڑھی تاریخی ݙیسی اوں تے انتخابات کریسوں۔ وفاقی وزیر اطلاعات آکھیا جو پاکستان اچ انٹرنیٹ اتے سوشل میڈیا تے کوئی پابندی کائنا ہئی۔ انتخابات دے ݙینھ فکسڈ براڈ بینڈ چلدا پئیا ہئی۔ انہاں آکھیا جو پوری دنیا اچ سکیورٹی پاروں انٹرنیٹ سروس بند کیتی ویندی اے، 2022ء اچ دنیا دے 35 ملکاں اچ 187 واری انٹرنیٹ سروس بند کیتی ڳئی اے۔ انہاں آکھیا جو گزریل ݙینھ 61 واقعیاں اچ 16 شہادتاں تھین، انتخابات توں ہک ݙینھ پہلے 28 شہادتاں تھین۔ 15 جنوری دے بعد 47 واقعات تھین جئیں اچوں ست آئی ای ڈیز اتے 26 گرینیڈ دھماکیاں دے واقعے تھین۔
