لاہور ۔20مئی (اے پی پی):وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے نینگر ساݙا مستقبل ہن حکومت دی پوری توجہ پاکستانی طلبہ تے لڳی اے ،بشکیک توں واپس آو آلے طالبیں دی سہولت سانڳے ہر ممکن قدم چیسوں ۔ اللہ دا شکر اے بشکیک واقعہ اچ کوئی پاکستانی طالب علم جاں بحق نی تھیا ۔اے ڳالھ انہاں علامہ اقبال انٹرنیشنل ایئر پورٹ تے بشکیک توں خصوصی پرواز دے ذریعے پاکستان آوݨ آلے 170 پاکستانی طلبہ دے استقبال دے موقع تے میڈیا نال ڳالھ مہاڑ کریندے ہوئیں آکھی اے ۔ وفاقی وزیر اطلاعات آکھیے جو کرغزستان دی مقامی ایئر لائن ایرو نومیڈ دی چوتھی پرواز اڄ پاکستان پڄی اے جیں اچ 170 پاکستانی طلبہ وطن واپس آئے۔ مجموعی طور تے 540 طلبہ پاکستان واپس پڄ چکئن ۔ انہاں آکھیے بشکیک اچ صورتحال تشویشناک رہی، ساݙے طلبہ اچ خوف و ہراس کھنڈیا رہیا ، وزیراعظم پاکستانی سفیر نال رابطے اچ رہیے انہاں آکھیے طلبہ دی پریشانی تے وختی ایکشن ڳھدا ۔ انہاں آکھیے پاکستانی طلبہ دی سہولت سانڳے حکومت ہر ممکن قدم چیندی پئی اے وفاقی وزیر آکھیے طالبیں دے تحفظ اتے انہاں دی تعلیم سانڳے ہرممکن قدم چیسوں ۔ انہاں آکھیے ساݙی کوشش ہوسی جو طلبہ کوں حالات چنڳے تھیوݨ تے واپس بھجوایا ونڄے تاں جو او آپݨی ڈگریاں مکمل کرسڳن ۔ وفاقی وزیر آکھیے وزیراعظم دی خصوصی ہدایت تے پاکستان واپس آوݨ آلے طالبیں دے استقبال سانڳے وزرا ایئر پورٹس تے موجود ہن تاں جو طالبیں کوں اے احساس تھیوے جو او کلھے کائنی ۔ انہاں آکھیے وزیر اعظم دا وژن اے جو طالب ساݙا مستقبل ہن انہاں کوں کوئی اوکھ نہ تھیوے حکومت انھاں دے معاملات خود ݙیکھدی پئی اے انہاں آکھیے اسپیشل فلائیٹ زخمی طلبہ کو گھن تے پاکستان آندی پئی اے ۔ ایندے توں پہلے وفاقی وزیر اطلاعات ایئر پورٹ تے پاکستان آوݨ آلے طالبیں دا استقبال کیتا تے انہاں کوں پھل پیش کیتے ایں موقع تے طالبیں تے انہاں دی فیملیزنال ڳالھ مہاڑ کریندے ہوئیں وفاقی وزیر اطلاعات یقین ݙیوائے طالبیں دے مسئلے ترجیحی بنیاداں تے حل کیتے ویسن ۔
