اسلام آباد۔4اکتوبر (اے پی پی):وزیراعظم عمران خان آکھیے جو مہنگائی دی بنیادی وجہ درآمدی افراط زر اے، بدقسمتی توں اساݙے ملک دا نظام اشرافیہ کیتے ہے، انصاف، تعلیم، قرض سودھا ساریاں سہولتاں امراء اتے اشرافیہ کیتے ہن ، حضرت محمدۖ ﷺ پہلے فلاحی ریاست بݨائی ول خوشحالی آئی، ماضی اچ اپنایا ڳیا اے تصور غلط ہئی جو پہلے پیسہ آوے تے ول فلاحی ریاست بݨیسوں ، انسانیت اتے انصاف سولائزیشن دی بنیاد ہن، عالمی سطح تے تیل دیاں قیمتاں اچ سو فیصد ودھارا تھیا لیکن اساں لیوی اتے سیلز ٹیکس اچ 400 ارب روپے سالانہ دا خسارہ برداشت کرتے صرف 22 فیصد اضافہ کیتا ، قیمتاں اچ ودھارے دا اساکوں احساس اے ایں کیتے آندے ݙینھاں اچ کمزور طبقے کوں ٹارگٹڈ سبسڈی ݙیوݨ ویندے پیوں ۔ او سنوار کوں اتھاں کامیاب پاکستان پروگرام دے اجراء دے موقع تے منعقدہ تقریب توں خطاب کریندے پئے ہن ، ایں موقع تے وزیر خزانہ شوکت ترین، وزیراعظم دے معاون خصوصی امور نوجوانان عثمان ڈار، چیئرمین پاکستان ہاؤسنگ اتھارٹی لیفٹیننٹ جنرل (ر) انور علی حیدر وی خطاب کیتا۔ وزیراعظم وزیر خزانہ شوکت ترین اتے انہاں دی ٹیم کوں کامیاب پاکستان پروگرام دے آغاز تے مبارخ ݙیندے ہوئیں آکھیے جو اے پروگرام 74 سال پہلے شروع تھی ونڄݨا چاہیدا ہئی اساݙی سوچ غلط ہئی جو پہلے پیسہ آوے اتے ول فلاحی ریاست بݨیسوں ، وزیراعظم آکھیے جو مدینہ دی ریاست دی ڳال اساں دنیا دے کامیاب ترین ماڈل دی وجہ توں کریندوں ، اے تاریخ دا حصہ اے، اے ھک حقیقت اتے تاریخ ہے جو ھک ایجھی تہذیب جیں دی کوئی حیثیت نہ ہئی او دنیا دی امام بݨ ڳئی ۔ وزیراعظم آکھیے جو نبی ﷺدی سنت اتے شریعت دی پیروی دا حکم الٰہی اساݙی بہتری کیتے ہے ، جے اساں ایندے تے عمل کریسوں تاں اساݙا آپݨا کردار چنڳاں تھیسی ، وزیراعظم آکھیے اساݙی کوشش اے جو متوسط طبقے کوں اتے گھن آؤں ، انہاں کیتے ہاؤسنگ دے شعبہ اچ فنانسنگ وچ مشکلات دور کیتیاں ، کمرشل بینکاں کنے انفراسٹرکچر اتے تربیت دے فقدان دی وجہ توں اساں وزیر خزانہ شوکت ترین دے مائیکرو فنانس دے تصور توں اتفاق کیتا۔ وزیراعظم آکھیے جو کامیاب پاکستان پروگرام ھک سنگ میل ہوسی، عام آدمی دی زندگی بہتر بݨاوݨ کیتے اقدامات توں برکت آندی اے ۔ وزیراعظم آکھیے جو کامیاب پاکستان پروگرام اچ آوݨ آلے مسئلیں دی مانیٹرنگ کیتے نظام ہووݨا چاہیدے ۔ وزیراعظم آکھیے جو حکومت غربت نال نبݨݨ کیتے پوری طرح کوشاں اے، دنیا اچ پٹرولیم مصنوعات دیاں قیمتاں اچ 100 فیصد ودھارا تھئے جݙاں جو اساں 22 فیصد ودھارا کیتے ۔
